Dobre konjunkturne wuwiće so tež w Hornjej Łužicy pozitiwnje na dźěłowe wiki wuskutkuje. Bjezdźěłnosć tu dale woteběra, a to we wšitkich starobnych­ skupinach.

Budyšin (CK/SN). Ličba bjezdźěłnych je w meji we wšitkich wotnožkach Budyskeje agentury za dźěło woteběrała. Na­jebać to je kwota bjezdźěłnych dale jara rozdźělna. W Radebergu wučinja wona 4,5 procentow, w Kamjencu pjeć. W zapadnych regionach dźěłozarjadniskeho wobwoda profituja dale wot dźěłowych poskitkow w sakskej stolicy. Porno tomu ma Zhorjelc z 12,5 procentami najwyšu kwotu bjezdźěłnosće cyłeje wuchodneje Sakskeje, na druhim městnje steji Běła Woda z 11,1 procentom. W starobnej skupinje młódšich hač 25 lět je 1 260 bjezdźěłnych registrowanych. W Zhorjelskim wokrjesu třećina z nich žane wotzamknjene powołanske wukubłanje nima. Tohodla su so dźěłowa agentura, jobcenter a Zhorjelski młodźinski zarjad 28. meje dojednali, wutworić młodźinsku dźěłowu agenturu. Tak chcedźa swoje­ poskitki walčkować a předewšěm potrjechenym młodym ludźom přistup k dźěłowym wikam abo k wukubłanju zmóžnić.