W Hornjej Łužicy a Delnjej Šleskej dale a wjac turistow – tež z wukraja
Budyšin (SN/BŠe). Hornja Łužica ma dźeń a wjac wopytowarjow. Tak je lětsa dotal 6,6 procentow wjac turistow w regionje přenocowało hač loni. Tole zdźěli Marketingowa towaršnosć Hornja Łužica a Delnja Šleska (MGO) ze sydłom w Budyšinje na naprašowanje SN. Do statistiki zapřijate su hosćency, hotele a pensije z wjac hač dźesać łožemi. Nowy nawoda za wobłuk turizm w MGO Tobias Hajdan pokaza na to, zo su w regionje tež jara derje wuhotowane priwatne móžnosće přenocowanja, kotrež so w statistice njejewja.
Najwjac hosći přebywa w Hornjej Łužicy a Delnjej Šleskej jedyn dźeń. Tak naličichu turistikarjo wosom a poł króć telko dnjowych hosći a přenocowarjow. Wopytowarjo regiona su přewažnje z Němskeje, štož wučinja 95 procentow. Mnozy z nich přichadźeja ze Sakskeje abo Braniborskeje. Pjeć procentow wopytowarjow su wukrajnicy, při čimž Nižozemska statistiku nawjeduje. Rady přichadźeja tež turisća z Čěskeje a Pólskeje, na štwórtym a pjatym městnje sćěhujetej Šwicarska a Awstriska.