Budyšin (SN/BŠe). Powołanske wiki wosebiteho razu přewjeduja dźensa a jutře w Budyskim Kamjentnym domje. Tam poskićeja wustajerjo aktiwny parcours, na kotrymž móža so zajimowani šulerjo wuspytać. „Předewzaća su do štyrjoch wobłukow rozrjadowane: rjemjeslnistwo, industrija, posłužby a socialne powołanja“, rozłoži sobudźěłaćerka Budyskeho krajnoradneho zarjada Andrea Prager. Zarjad, wokrjesne rjemjeslnistwo a Industrijowa a wikowanska komora powołanske wiki zhromadnje organizuja.
W mjenowanych štyrjoch wobłukach móža so šulerjo dokładnje wobhonić a so samo na wšelakich mašinach wuspytać. Zbližić móža sej zakładne ručne dźěła rjemjeslnika kaž tež hladanje chorych a staršich ludźi, za čož su wustajerjo łožo a wulku klanku sobu přinjesli. „Smy šule z wokrjesa přeprosyli. Tak wjeselimy so dźensa a jutře na 710 přizjewjenych zajimcow z wokoliny, kotřiž přijědu z busom. Dalši přichadźeja hnydom z Budyšina“, wujasni Andrea Prager.