Prózdninske domy a bydlenja dźeń a požadaniše
Raduš (SN/mwe). Błóta hotuja so nastupajo turistiske zwičnjenje na zymu. „Naš region je přez cyłe lěto dale a atraktiwniši pućowanski cil. Knihowanje hotelow a pensijow nas powšitkownje jara spokoja, tež hladajo na nazymske prózdniny. Etablěrowane zarjadowanja kaž „błótowske hody w Lubnjowje a na Lědach“ běchu minjene lěta derje wopytane. To so tež w ličbach knihowanjow wotbłyšćuje“, zdźěli na naprašowanje našeho wječornika dr. Katja Franke, sobudźěłaćerka zjawnostneho dźěła błótowskeho turistiskeho zwjazka w Radušu.
W přirunowanju z lětom 2015 je lětsa wot januara do julija wjace wopytowarjow a turistow w Błótach přebywało, a to přewažnje w prózdninskich domach a bydlenjach. Přirost wučinja 11,7 procentow, štož rěka, zo je w mjenowanym času 406 832 ludźi wjace hač milion přenocowanjow knihowało.