Vattenfall skutkuje nětko pod nowym mjenom

Choćebuz (AK/SN). Rozsud wo tym, hač wuhlowu jamu Wochozy z prioritnym pasmom južnje Slepoho rozšěrja ma hač do klětušeho lěća padnyć. „Wón dyrbi dozrawjeny być. Njeje to jenož předewzaćelski rozsud, ale je sylnje wotwisny wot toho, kak stabilne su ramikowe wuměnjenja za brunicu a kotre wične rizika so pokazuja“, rjekny wčera čłon předsydstwa noweho čěskeho mějićela łužiskeje brunicoweje sparty Energetický a Průmyslový Holding EPH Jan Špringl. Ju chcedźa zaměrnje dale wjesć a tež dale wuwiwać. Z Vattenfall Europe Mining AG nastanje nětko Łužiska energijowa a hórnistwowa AG a z Vattenfall Europe Ge­neration AG Łužiska energijowa a milinarnjowa AG. Za wobě firmje steji přichodnje třěšne mjeno LEAG. Tole wozjewi Vattenfall wčera po posedźenju wjednistwa koncerna.