Koncern Prinzhorn Holding, kotryž wudźeržuje stejnišća w 15 krajach, wotpohladuje w swojim zawodźe w Čornej Pumpje produkciju rozšěrić.

Čorna Pumpa (JoS/SN). Zawod Hamburg-Rieger, přisłušacy předewzaću Prinz­horn Holding, natwari w Čornej Pumpje nowu papjerowu mašinu. Wo tym informowaše koncern wčera na nowinarskej konferency na łužiskim stejnišću zjawnosć. Cyłkownje nałoža za to 370 milionow eurow. Tuž běchu wčera mnozy zastupnicy z politiki přišli. Mjez nimi běchu Braniborski hospodarski a energijowy minister Albrecht Gerber (SPD), Grodkowscy zapósłancy Zwjazkoweho sejma Ulrich Freese (SPD), dr. Klaus-Peter Schulze (CDU) a Birgit Wöllert (Lěwica), kaž tež mnozy měšćanosća a wjesnjanosća regiona.

Z inwesticiju maja 200 nowych dźěłowych městnow nastać, z nich 15 wukubłanskich, kaž wčera rěkaše. Nowa, druha papjerowa mašina ma wjetša a wukonićiša być hač dotalna. Ze šě­rokosću 7,90 metrow móže wona lětnje 493 000 tonow běłeje a bruneje zakładneje papjery a papjerca ze stoprocentowskeje stareje papjery naprodukować.