Ratarjo nimaja hišće wuslědki lětušich žnjow – hotuja pak so hižo na klětu
Róžant/Hodźij/Chrósćicy (JK/SN). Hospodarske lěto bě wosebje za ratarjow jara přerosćene. Po njepřijomnym nalětnim wjedrje a krupach w meji, kotrež su zdźěla chětro wulku škodu nadźěłali, dyrbjachu burja za čas žnjow kóždu słónčnu hodźinu wužiwać, zo bychu znajmjeńša to dozrawjene w poměrnje dobrym stawje žnjeli. Předołho su trjebali, zo bychu žně zakónčili.
Dotal hišće žadyn ratar Budyskeho wokrjesa dospołny přehlad wo wunošku žnjow nima. Předsyda Agrarneje akcijneje towaršnosće Sorabia Róžant Matej Korjeńk čaka přeco hišće na wotličenje zawěsćernje, kotraž měła škody mejskich krupow regulować. Nimo toho wón z wunoškom žnjow wjedra dla tak prawje spokojom njeje. Zasadne změny produkciskeje struktury a płodoslěda pak klětu w Sorabiji njebudu a hinak ratarić tež njebudu. „Budźemy dale naše pola po zwučenym wašnju wobdźěłować a mloko produkować. Nima zmysła, jednoho nic tak dobreho lěta dla zasadnje něšto změnić“, rěka wuhlad Mateja Korjeńka do přichoda.
