Kamjenc (aha/SN). Prjedy hač je zawčerawšim w Kamjencu pjekarnja klóštra Marijineje hwězdy swój wobchod wote- wrěła, bě tam hižo minjenu sobotu Budyski předewzaćel Jan Kubaš zhromadnje z dr. Carstenom Pfeiferom swój wosebity wobchod „noha a črij“ wotewrěł.
Jan Kubaš bě 1986 na Serbskej polytechniskej wyšej šuli w Budyšinje pruwowanja srjedźneje zrałosće złožił a nawukny na to powołanje mašinotwarca. Po přewróće studowaše w Goslaru zawodne hospodarstwo a dźěłaše po tym we wulkim koncernje w krajach cyłeho swěta. Před dwanaće lětami rozsudźi so zhromadnje z fachowcom za ortopediske wobuća dr. Pfeiferom, kotrehož dźěd a nan běštaj šewcaj, na Budyskich Mjasowych wikach wotewrěć specielny wobchod za ortopediske črije, z kotrymž žněješe spěšnje dowěru kupcow.