Ličba wopytowarjow wobstajnje přiběra

Rań (AK/SN). We łužiskej jězorinje je minjene pjeć lět třiceći nowych kwalitnych předewzaćow nastało. Ličba přenocowanjow rozrosće wot 484 000 w lěće 2012 na 562 000 loni. „Tež hdyž naš wulki zaměr – 1,5 milionow přenocowanjow lětnje – hač do lěta 2020 njedocpějemy, směmy spokojom być“, rozłoži Kathrin Winkler, jednaćelka kraje přesahowaceho turistiskeho zwjazka Łužiska jězorina z.t. na wčerawšej regionalnej konferency. Něhdźe sto zastupjerjow komunow, zarjadow­, předewzaćow, towarstwow a zwjaz­kow so tam wobdźěli. Konferenca steješe pod hesłom „Dokal pućowanje wjedźe – z rozhladom k cilej“.