Ptača gripa z wirusom H5N8 so dale a bóle rozpřestrěwa. Mjeztym je tež hižo pad we Łužicy blisko sakskeje stolicy znaty. Kak plahowarjo pjerizny w regionje na to reaguja?

Rakecy/Brěžki (SN/BŠe). „Njeboju so, dyrbimy pak strózbi wostać a wěcownje jednać“, rjekny nawodnica Rakečanskeje plahowarnje husycow Andrea Lau na naprašowanje Serbskich Nowin. W zawodźe z něhdźe 3 000 husycami njeje hižo žadyn kontakt zwěrjatow k pjeriznje w přirodźe móžny. Husy plahuja w Rakecach tuchwilu pod třěchu, přidatnje su nětko hišće nabóčne škitne saki připrawili. Tež ludźo, kotřiž w zawodźe njedźěłaja, nimaja wjac žadyn kontakt k husycam. „Naš zawod dodźerži wšitke biologiske wěstotne naprawy“, nawodnica wujasni. Tak čisća wšědnje tež jězdźidło, kotrež picu roznošuje. „Kedźbliwosć je tuchwilu najwažniša. Połoženje jara chutnje bjerjemy“, podšmórny Andrea Lau.