Łužiska hospodarska iniciatiwa myto Lex spožčiła
Choćebuz (SN/BŠe). Mjena mytowanych 13. wurisanja za Łužiske myto załožerjow eksistency (LEX) su jasne. Wčera je Łužiska hospodarska iniciatiwa (WiL) dobyćerjow na Borborinej žurli hłowneho zarjadnistwa předewzaća LEAG w Choćebuzu jich přeswědčiweho předewzaćelskeho koncepta dla wuznamjeniła.
Sydom nominowanych wobchodnych idejow bě iniciatiwa hižo w oktobrje wozjewiła, a jury je mytowanych nětko wuzwoliła. Mějićel sakskeje spirituozoweje manufaktury z Korzymja Martin Wagner doby prěnje myto, dotěrowane z 4 000 eurami. „Z našimi wudźěłkami, kotrež zhotowjamy w tradicionalnym ručnym dźěle, chcemy ludźom słód płodow regiona zbližić“, wuswětli załožer manufaktury Martin Wagner. Tak nastawaja w Korzymje likery a destilaty ze surowiznow domizny. Wšitke produkciske kročele wot spočatnych žnjow přez rjedźenje płodow hač k zhotowjenju spirituozow na zakładźe tradicionalnych receptow su ručne dźěło. Samo etikety tam z pjerom popisuja.