Je pomału načasu wupytać sej čerstwy a rjany hodowny štom

Budyšin/Holešow/Konjecy (SN/BŠe). Kóždolětne pytanje za hodownym štomom je zahajene. Čerstwy a derje zrosćeny ma być. Kumštne so mjez kupcami w našim regionje přesadźili njejsu.

Wot minjeneje soboty předawa Matijas Pěčka w swojim Holešowskim zahrodnistwje štomiki družin nordmannowa jědla a módry šmrěk, při čimž je prěnja mjenowana mjez ludźimi najwoblubowaniša. „Napadne lětsa je, zo sej wjele ludźi radšo štomy, wyše hač dwaj metraj, kupuje“, praji mějićel Holešowskeho zahrodnistwa. Zašłe lěta rozsudźichu so kupcy bóle za mjeńše štomy, kotrež stajachu sej doma na blidko abo kamorčk.