Drježdźany (SN/BŠe). 492 wustajerjow – telko kaž hišće nihdy – předstaji a rozłoži wot jutřišeho do njedźele zajimcam na wikach „KarriereStart“ w Drježdźanach najwšelakoriše powołanske móžnosće. Wot industrije přez rjemjeslnistwo, medije, wikowanje, posłužby, medicinu abo hladanje budu tam wšitke wobłuki zastupjene. Za młodostnych je to tuž optimalna šansa, wo powołanjach a perspektiwach so informować. Z Łužicy wobdźěli so Budyski powołanskošulski centrum za techniku a hospodarstwo. Tež Kamjenski powołanskošulski centrum, hdźež poskićeja fachowe wukubłanje drjewoweje techniki, budźe mjez wustajerjemi. Dale podadźa so zamołwići Budyskeje studijneje akademije do Drježdźan. Z Delnjeje Łužicy změje Braniborska techniska uniwersita Choćebuz-Zły Komorow stejnišćo na přehladce. Štož medicinski a hladanski wobłuk nastupa, pokazaja Hornjołužiske kliniki na bohaty powołanski poskitk. Dale chcetej wuspěšne předewzaće iteligence, kotrež ma sydło mjez druhim w Słonej Boršći, a Kulowski zawod Maja młodostnym powołanske móžnosće rozjasnić.