Nalětnje słónco zemju wohrěwa a přiroda wotuća ze zymskeho spara. Najwjetši čas tuž tež za sobudźěłaćerjow Wochožanskeho parka błudźenkow nalětnje dźěła na płoninach zahajić.
Wochozy (AK/SN). Pjeć do šěsć tydźenjow je trěbnych, zo bychu we Wochožanskim parku błudźenkow cyłkownje něhdźe 130 družin lětnjeho wrjosa Calunia přitřihali, rozkładujetej sobudźěłaćerce parka Heike Michalk z Krynhelec a Erika Starke z Hamora. Wonej słušatej k 20 přistajenym. Wosmjo z nich su krajinowi zahrodnicy. Tamni su z wobłuka turistiskeje informacije, zjawnostneho dźěła a zarjadnistwa, abo su domownicy.
Klaus Tschöke je park błudźenkow sobu wutworił. Do toho bě wón wjele lět pola Vattenfalla we wobłuku rekultiwowanje dźěłał. Dźensa je wón čestnohamtski jednaćel za personal a techniku w parku błudźenkow. „Pućiki po parku maja so wobstajnje přepruwować a wuporjedźeć“, wón rozkładuje. Cyłkownje ma park 7 000 metrow pućikow. „Ławki a dalše sedźenske městna dyrbimy prawidłownje reparować a płoty přehladać. Cyły park so nastajnosći přeměnja“, Klaus Tschöke rozłožuje.
