LEAG wčera koncept wo přichodźe brunicoweho rewěra předstajiła
Choćebuz (SN/BŠe). Plany přichodnych 25 do 30 lět łužiskeho brunicoweho rewěra leža skónčnje na blidźe. Wčera wječor je towaršnosć Łužiska energija a milinarnje (LEAG) zjawnosći koncept z tójšto překwapjenkami předstajiła. Tak njebudu někotre plany rozšěrjenja brunicowych jamow zwoprawdźene. Wodychnyć móže 900 wobydlerjow w kónčinje wokoło Janšojc. Wsy Grabk, Wótšowaš a Kerkojce njebudu wotbagrowane. „Dźesać lět planowanskich jednanjow je wjele horja a njewěstosće w gmejnje zawinowało. Žadamy sej nětko w krajnym wuwićowym planje trajnu planowansku wěstotu. To je nam braniborske krajne knježerstwo po telko lětach dołžne“, zdźěli wjesnjanosta Derbnjanskeje gmejny Peter Jeschke (CDU), kotrejž potrjechene wsy přisłušeja.