Naprašowanje za rědkimi družinami zeleniny přiběra
Błóta (SN/BŠe). Zeleninu topinambur kupcy tuchwilu w nimale kóždym předawanišću wuhladaja. Wšako su žně na přikład w Błótach hakle njedawno zakónčili.
Na běrny podobne dule předawa Heinz-Peter Frehn ze swojim synom Christophom na swójskim biodworje w błótowskej wsy Wjelike Šenkojce (Steinreich). Na wosom hektarach je tam minjenu sezonu topinambur plahował. „Přestrjeń je kóžde lěto samsna. Hdyž maš jónu topinambur na polu, potom tam tež wostanje“, Heinz-Peter Frehn wuswětla. Z lětušimi žnjemi, kotrež su tele dny dokónčili, je wón přewšo spokojom, byrnjež dźiwje swinje zaso „pilnje sobu pomhali“. Kompletny wunošk předźěłuje firma, kotraž wužiwa topinambur jako přirodny słód, na přikład tež za brěčki. „Topinambur čerstwy na wikach poskićeć so za nas tuchwilu hišće njewudani“, wón měni. Žně topinambura su tež jara wobćežne. Dule leža pod zemju a na žnjach zběraja mašiny tež mnohe kamjenje, kotrež maja sobudźěłaćerjo potom zaso wuběrać.