Marko Šiman zasadźa so za wutwar awtodróhi A 4

Budyšin (SN/BŠe). Zwjazkowa awtodróha A 4 je so minjene lěta na wažny wobchadny zwisk mjez zapadom a wuchodom wuwiła. Njezadźiwa tuž, zo je tež wobchad chětro přiběrał. Zapósłanc Sakskeho krajneho sejma Marko Šiman (CDU) pak skedźbnja nětko na to, zo móhło so połoženje dale přiwótřić. Wot junija je móžno bjez wizuma wot Ukrainy do Němskeje jěć. Šiman sej tuž žada awtodróhu na šěsć jězdnjow wutwarić. „Je nuznje trjeba jednać. Hewak njeje A 4 bórze hižo wužiwajomna“, wón potwjerdźa. Budyski wyši měšćanosta Alexander Ahrens (SPD) so žadanju Šimana přizamknje. „To je logiske a konsekwentne, wšako je nadróžny wobchad hłowny nošer logistiskich nadawkow. Region ma potencial, dale rozrosć. Tohodla je dalši wutwar hłowneho zwiska njeparujomny,“ wón na naprašowanje SN zdźěli.