LMBV swoju dźěławosć bilancowała

Rań (SN/BŠe). Přińdźeš-li na přibrjóh Rańskeho jězora, wuhladaš bjezposrědnje pódla nastawaceho přistawa palmy a hižo rjenje wuhotowane terasy. K dowolowej atmosferje jenož hišće woda pobrachuje. „Klětu chcemy tu delni wodowy schodźenk docpěć“, wuswětli šef Łužiskeje a srjedźoněmskeje towaršnosće hórnistwoweho zarjadnistwa (LMBV) Klaus Zschiedrich nowinarjam tydźenja w Ranju (Großräschen), hdźež je dźěławosć LMBV bilancował. Hižo w septembru pak chcedźa započeć wodu z wosebitymi srědkami wobdźěłać, štož hižo na tamnych jězorach wuspěšnje činja. Jako dobra wopokazuje so saněrowanska łódź Klara, kotraž je tuchwilu na Parcowskim jězoru zasadźena. Loni su tam 8 000 tonow wapna do wody sypali, lětsa ma to 30 000 tonow być. Wot lońšeho septembra je ph-hódnota wody dźak wapnu wot 2,8 na 4,8 postupiła. Kwalita je so jara polěpšiła, štož je tež na barbje widźeć. Woda je nětko wo wjele swětliša a tuž přewidniša. „Móhł rjec, zo staramy so tu wo karibi­ske wuměnjenja“, Zschiedrich z posměwkom měnješe.