Skórnik měri so na sakske lěsy, statne kaž tež priwatne

Drježdźany/Budyšin (JK/SN). Lětuše, dotal jara njewobstajne wjedro drje njeje mnohim dowolnikam tak lube. Jednomu z najznaćišich lěsnych škódnikow, skórnikej (Borkenkäfer), pak wone wosebje tyje. Kaž wotrjadnik w statnym lěsniskim zawodźe Sachsenforst Lutz-Florian Otto wobkrući, wopušćeja potomnicy prěnjeje generacije skórnikow w sakskich lěsach swoje lehnišća a su po puću, zo bychu so předewšěm dali do šmrěkow w pahórčinje a nišich regionach srjedźnych horin.

Dalši wotrjadnik w zawodźe Sachsenforst, Koćinjan Cyril Šołta, njewidźi w tuchwilnej situaciji žadyn strach za lěsy našeho regiona. „Z pomocu stajnych kontrolow, tak mjenowaneho monitoringa, mamy naše statne lěsy pod kontrolu. Rewěrowi hajnicy kaž tež lěsni dźěłaćerjo dokładnje kedźbuja, zo bychu prěnje pokazki na skórnika spóznali a wotpowědne naprawy zahajili, zadźěwać wuwiću a rozšěrjenju škódnika. W konkretnych padach informujemy tež priwatnych wobsedźerjow lěsow w namjeznych regionach statnych lěsow.“