Łužica – ležaca na wuchodźe Němskeje, na mjezy k Pólskej a Čěskej kaž tež k wuchodnym krajam Europy – skići zajimawe hospodarske połoženje. Strukturna změna móhła tuž šansa być.
Budyšin (SN/BŠe). Hižo někotre lěta rěčimy we Łužicy wo strukturnej změnje, wšako je wotwidźeć, zo so brunicowe hórnistwo poněčim kónči. Strukturny łamk, kajkiž bě region po politiskim přewróće dožiwił, chcedźa zamołwići hospodarstwa a politikarjo wotwobarać. W lěće 2015 dojednachu so potrjechene wokrjesy Budyšin, Zhorjelc, Sprjewja-Nysa, Łobjo-Halštrow a Dubje-Błóta na zhromadne dźěło a dorozumichu so hospodarski region Łužica wutworić. Pod třěchu towaršnosće chcychu zhromadnje za perspektiwu pytać.