Sydom milionow eurow dóstanje dźěłarnička přichoda hač do lěta 2020
Zhorjelc (AK/SN). Łužica trjeba za přichod jasne hospodarske a industrijnopolitiske směrnicy. Wona trjeba dołhodobne a zawjazowace projekty. Tole zdźěłać je sej „dźěłarnička přichoda Łužicy“ hač do lěta 2020 předewzała. „Chcemy profil regiona zesylnić“, rjekny Heike Zettwitz, decernentka za wobswět, twarski dohlad, lěsnistwo a wuwiće Zhorjelskeho wokrjesa na wčerawšim zahajenskim zarjadowanju w Zhorjelcu. Jako najwažniše ćežišća mjenowaše wona energijowu eficiencu, mobilitu a digitalizaciju kaž tež škit zwěriny a turizm. Nimo toho ma perspektiwy regionalneho wuwića a spěchowanje předewzaćow hladajo na zwoprawdźenje nowych idejow za přewšo wažne.