W dźěćacej stwě zrodźena myslička so jako wuspěšna wopokazała
Rowno (kö/SN). W dźěćacej stwě na Rownjanskim staršiskim statoku měješe Peter Schuster prěnje ideje. Zwoprawdźał je je hnydom pódla w małej dźěłarni, a to ze zaměrom, sam něšto na nohi stajić – nic něhdźe druhdźe, ale doma we Łužicy.
Rownjan je jako twarski inženjer wjele lět mjez domiznu a Badensko-Württembergskej dojězdźował. „Stajnje běch na montaži“, wón dźensa powěda, „ale cyle preč wottud nochcych.“ Na jednej ze 600 kilometrow dołhich awtowych jězbow lěta 2007 krótko do hód sej wón wuwědomi, zo dyrbi něšto změnić. A zrodźi plan so zesamostatnić. Hižo lěto pozdźišo swoje dźěło wupowědźi a załoži firmu ATD-Models po koncepće, software programować. Wuslědk běchu wobličenske modele za tak mjenowane crashtest-dummyje.