Brunicowy wuběrk wariantu noweje železniskeje čary podpěruje

Budyšin (AK/SN). Rěčičanske zastanišćo při železniskej čarje Zhorjelc–Choćebuz–Berlin chcedźa najebać přepołoženje čary­ rozšěrjenja Rychwałdskeje brunicoweje jamy dla zachować. Tež haty blisko Rěčic njebudźe nowa čara prěkować. To wobzamkny minjeny pjatk brunicowy wuběrk­ regionalneho planowanskeho zwjazka Hornja Łužica-Delnja Šleska na swojim posedźenju w Budyšinje. Jednohłósnje wuprajichu so radźićeljo k wo­sebitemu jednanju, kotrež je nětko za to trěbne. „Dotal wšak bě předwidźane, zo měło blisko Rěčic nowe zastanišćo za ćah nastać, za čož dyrbjeli wulki móst twarić. To pak njewotpowěduje přećam woby­dlerjow“, měnješe nawoda hórnistwo­weho planowanja předewzaća Łužiska energija a milinarnje (LEAG) Gerd Klocek. Z pjatkownym wobzamknjenjom brunicoweho wuběrka, zastanišćo njepřepołožić, móže energijowy koncern tuž derje žiwy być. Gerd Klocek wšak na to­ skedźbni, zo Němska železnica nowu­ čaru twari. Sakska krajna direkcija je za planowanje zamołwita a je tuž wšelake warianty pruwowała.