Disciplina spaduje, twarscy předewzaćeljo znapřećiwjeja
Budyšin (SN/JaW). Wokrjesna wotnožka dźěłarnistwa twarstwo, agrar a wobswět, IG BAU, w Budyšinje žada sej striktniše dodźerženje naprawow k škitej před koronawirusom. To wuchadźa z nowinskeje zdźělenki dźěłarnistwa. „Předewšěm w Budyskim wokrjesu dźěłaćerjo na twarnišćach postajenja wotstawka a hygieny ranja“, kritizuje wokrjesny předsyda Peter Schubert. „Mnohe zawody strach na lochke ramjo bjeru. To mam za fatalne.“
Kaž w zdźělence dale rěka, twarscy dźěłaćerjo dźeń a časćišo po zajězdźenych mustrach dźěłaja. „Mnozy předewzaćeljo strach infekcije jednorje wusćinjeja“ (ausblenden), měni Schubert. Dale a husćišo storči dźěłarnistwo při kontrolach twarnišćow na „hrube hrěchi“. Jedne z najčasćišich přeńdźenjow je, zo njemóža sej dźěłaćerjo scyła ruce myć. „Za jednorym myjadłom z wodu a mydłom husto podarmo pytamy. Wo desinfekciskich srědkach scyła njerěču.“