Za přichod trjebaja lěpšu motiwaciju a nowe perspektiwy
Budyšin (SN/BŠe). Hladajo na wunoški žnjow móžeše wjetšina ratarjow w Budyskim wokrjesu loni wodychnyć. „Dźakowano spadkam kónc apryla a spočatk meje, kaž tež chłódnišej meji a junijej njejsu rostliny tajki stres z horcotu měli. Hač do lěća su płody tuž derje rostli“, rozłožuje předsyda regionalneho burskeho zwjazka Budyšin-Kamjenc Stefan Triebs. Dobre wunoški ratarskim zawodam zdobom pjenjezy zawěsćeja, dokelž wone płody kaž pšeńcu, nazymski ječmjeń a rěpik, hroch kaž tež žonopowe zorno přewažnje předawaja.
Bohužel pak su tajke předewzaća, kotrež pola ze skerje lochkej zemju wobdźěłuja, znowa hubjene lěto dožiwili. Wosebje potrjechene su zawody na sewjeru wokrjesa z pěskowej pódu, kotraž njezamóže wodu porjadnje składować. Třeće lěto za sobu dyrbjachu so ze suchotu bědźić. „Přichodnje drje budźemy so na dlěše doby suchoty nastajić dyrbjeć. Kóžda dobra ideja pak wot dźensnišeho na jutře dobre płody njenjese. Ratarjo trjebaja wjace chwile za pozitiwne wuslědki“, Stefan Triebs wuswětla.
