Iniciatiwa wužiwa twarske płoty za wabjenje

Kamjenc (SN/BŠe). W Kamjenskim nutřkownym měsće steja nětko twarske płoty z namołwu regionalnje nakupować, štož w prěnim wokomiku zadźiwanje budźi. Što pak za tym tči? Poprawom Kamjenska cityjowa iniciatiwa štyri razy wob lěto tematiske předawanske zarjadowanja přewjeduje, zo by hosći zbliska a zdaloka do nutřkowneho města wabiła. „Towarstwu je wědome, zo je w tymle času njemóžne abo wobćežne nakupować“, wuswětla Anne Hasselbach ze cityjoweho managementa Lessingoweho města. Přiwšěm chcedźa so čłonojo iniciatiwy angažować a runje nětko po nowych, njekonwencionelnych, ale po postajenjam wotpowědnych pućach kročić. Tak běchu hižo we wobłuku Kamjenskeho parcoursa hodownych štomikow wulku hwězdu na twarskim płoće při klóšterskej cyrkwi připrawili.