Stupace płaćizny twaršćiznow so na firmy a kupcow rozdźělnje wuskutkuja

Kulow/Sernjany/Kamjenc (SN/JaW). Koronakriza so sylnje na twarsku branšu wuskutkuje. Runje nětkole, hdyž na mnohich serbskich wsach twarja, płaćizny za twaršćizny zdźěla njesměrnje stupaja.

Kaž twarscy knjezojo zwyšenje materialijow bolostnje začuwaja, maja z nim tež rjemjeslnicy a wikowarjo swoje brěmjo njesć. Wuwiće w Hornjej Łužicy je pak rozdźělne. Někotre zawody dyrbja zdźěla hižo krótkodźěło přizjewić, dalše maja hišće dosć činić. Předewšěm ćěslojo a třěchikryjerjo pod aktualnej situaciju ćerpja. Płaćizny za drjewo kaž tež dalše twaršćizny su so nimale potrojili, wobkrući našemu wječornikej nimo wjacorych wikowarjow tež jednaćel Kulowskeje firmy Kompletna třěcha Milan Šefer. Přičina je, zo najwjac drjewa, kotrež tež we łužiskich lěsach žněja, do wukraja wuwožuja, za domjace wiki ničo dale njezbywa.