Veolia inwestuje w Hamorje dźesać milionow eurow
Hamor (CK/SN). Z prěnim zarywom su wčera zamołwići zawoda Veolia a lokalni politikarjo na arealu Hamorskeje milinarnje startowy signal za twar sušenskeje připrawy wodočisćenskeho błóta dali. Veolia inwestuje do projekta dźesać milionow eurow. Klětu móhła nowa připrawa započeć dźěłać. Jeje wutroba, něhdźe 20 metrow dołha sušawa, budźe potom w zawrjenym bunkrje dźěłać. „To rěka, zo njebudźemy ničo čuć“, wuzběhny jednaćel zawoda Veolia Němska Laurent Hequet. Mokre błóto budźe přez prasu w prawidłownje ćeńkich šlebjerdach na dwěmaj pasomaj z drohowocla wodźene a při 200 stopnjach celsiusa sušene. Z toho nastawacy rozkuskowany granulat składuja potom w 25 metrow wysokim silu. Hač do 50 000 tonow błóta z wodočisćenja wob lěto chcedźa w nowej připrawje předźěłać – zwjetša ma wone z komunalnych rjedźernjow wopłóčkow tam dochadźeć.
