Přidatne naprawy nětko tež w Hornjej Łužicy
Budyšin (SN/BŠe). Afriska swinjaca mrětwa so po Braniborskej a Sakskej dale wupřestrěwa. Nětko su tak mjenowane wohrožene cony (pasmo II) a pufrowe cony (pasmo I) w Budyskim wokrjesu nowe zrjadowali. Na wjesnych taflach pokazki wotpowědne pasmo woznamjenjeja.
Jako wohrožena cona płaći cyły sewjer Zhorjelskeho wokrjesa. Tež dźěle gmejnow Sprjewiny Doł, Łaz, Radwor a najwjetši dźěl Budyskeho města su jako tajke woznamjenjene. Zwjazkowa dróha B 96 a zwjazkowa awtodróha A 4 tworitej tu hranicu. Linija ćehnje so dale na juh hač do Lubija a Wostrowca hač k pólskej mjezy. K tak mjenowanej pufrowej conje słuša najwjetši dźěl gmejnow zarjadniskeho zwjazka Při Klóšterskej wodźe. Linija wjedźe wottam dale hač do Sakskeje Šwicy.
