Ministerka Klepsch Budyske stanowanišćo při spjatym jězorje wopytała
Budyšin (CS/SN). Sakska ministerka za turizm Barbara Klepsch (CDU) so tele dny pola wjacorych poskićerjow turizma wobhonja, kak je so korona na nich wuskutkowała. Wčera bě na stanowanišću při Budyskim spjatym jězorje z hosćom a tam zhoni, zo je z pjeć hwězdami wuznamjenjena campingowa městnosć hižo zaso cyle derje wućežena. Přiwšěm jej mějićelka Birgit Haubner rozłoži, zo móžachu sezonu hakle swjatki zahajić a su tak hižo straty měli. Wšako njejsu wopytowarjow jutry abo na Bože spěće přijimać móhli. Po lockdownje su so mnozy turisća do směra na Sewjerne a Baltiske morjo orientowali. Tohodla bě tež junij hišće mało wućeženy. Birgit Haubner pak njeje njespokojom. Wona ma mnohich swěrnych wužiwarjow swojich posłužbow. A w času korony je stanowanje najwěsćiši dowol, wšako ma kóždy swój domicil sobu. Wotstawk mjez bydlenskimi wozami resp. stanami je runje tak zaručeny kaž w sanitarnych připrawach.