Budyšin (SN/BŠe). We wšelakich branšach wojuja tuchwilu wo lěpšu mzdu. Chětro krótkodobna připowědź, zo tež železnicarjo 24hodźinski stawk přewjedu, je wčera rano ke chaosej na dwórnišćach po cyłej Němskej wjedła. W Hornjej Łužicy pak njejsu so přistajeni předewzaćow Trilex a ODEG na stawku wobdźělili. Ćahi mjez Wojerecami, Zhorjelcom a Drježdźanami tuž jězdźachu. Přiwšěm mějachu ludźo ćeže ze zwiskami wosebje do Lipska a do Berlina.

Čłonojo dźěłarnistwa lokomotiwnikow GDL žadaja sej 3,2 procentaj wjace mzdy, lěpše dźěłowe wuměnjenja a koronapremiju 600 eurow. Tež w twarskim wobłuku tuchwilu wulki njeměr knježi. Minjeny kónc tydźenja su dźěłaćerjo wšelake akcije, předewšěm na zapadźe Němskeje přewjedli, zo bychu wo wyšu mzdu wojowali. Dźěłarnistwo twarstwo-agrar-wobswět (IG BAU) je w zwisku z aktualnymi tarifowymi jednanjemi zjawnje na situaciju skedźbniło.