We wažnym procesu łužiskeho hospodarstwa so srjedźny staw lědma jewi

Budyšin (SN/at). W napjatnišću mjez ko­ro­napandemiju, změnu strukturow kónca wudobywanja brunicy dla a pobrachowacymi fachowymi mocami wotměje so 21. srjedźnostawski dźeń (MiTag) w hospodarskim regionje Drježdźany. Tudyše Zwjazkowe zjednoćenstwo srjedźnostawskeho hospodarstwa (BVMW) na njón 7. septembra do hosćenca na Butrowej horje w Biskopicach přeprošuje.

„Chcemy wobdźělnikow-hospodarjow w tuchwilnym połoženju zmužić“, rjekny Wilfried Rosenberg, seniorski poradźowar za srjedźny staw a politiku w Budyskej jednaćelni BVMW. Na jednej stronje zwěsća wón mjez firmownikami nje­spo­kojnosć, na tamnej pak wulku potrjebu, sej mysle, starosće a nazhonjenja wu­měnjeć. Rosenberg je dobreje nalady, zo wob­dźělnicy zarjadowanje lětsa znowa přewšo motiwowani wopušća. A wón so nadźija, zo so rjadowanja a wuwiće pandemije dla planowanemu wotběhej zarjadowanja njespřećiwjeja.