Domanicy w Hózku lětsa prěni raz aroniju žnjeli

Budyšin/Drježdźany/Hózk (SN/BŠe). Hižo wot awgusta žněja ratarjo a zahrodnicy aroniju, kotrejež mjeno chětro eksotiske klinči. Poprawom pochadźa aronijowy kerk ze Sewjerneje Ameriki. Před něhdźe 150 lětami su tajke tež w Ruskej sadźeli, a w Němskej je mjeztym tohorunja tójšto zahonow, hdźež rostlinu plahuja. Wosebje w Sakskej a Braniborskej je jich dale a wjac. Najwjetša plantaža kerkow aronije w Sakskej, wopřijaca něhdźe 80 hektarow, drje je pola Coswiga. Tež w Hessenskej, Delnjej Sakskej abo Bayerskej je dźeń a wjac ratarskich zawodow, kotrež so aroniji wěnuja.

Po skromnych žnjach płodow minjene lěta móžachu ratarjo lětsa z rekordnymi žnjemi ličić. Kaž jednaćel Drježdźanskeho předewzaća Aronia-Original Jörg Holzmüller spočatk žnjow zdźěli, mějachu hladajo na wjedro optimalne wuměnjenja. Zyma bě dołha, lěćo bě włóžne, ale nic přećopłe. Nimo přidatnych naprawow přirodneje podpěry rósta płodow su hač do awgusta strowe słódne aronijowe jahody zrawili.