Krabatowy mlokowy swět wusměrja so dale do přichoda
Koćina (SN/BŠe). Krabatowy mlokowy swět w Koćinje inwestuje zaměrnje do přichoda a twari tuchwilu nowu modernu hródź, kotraž skića zwěrjatam wuběrny žiwjenski komfort. Z toho njeprofituja jenož dejki, ale wšitke starobne skupiny kruwow, jałojcow a ćelatow, kotrež w Koćinje plahuja. Tuchwilu maja zwěrjata swój domicil we wšelakich hródźach, kotrež su zestarjene, wjerchi niske a emisije wysoke. Twarjenja wotpowěduja wšak hišće narokam zwěrjećeho dobra, kotrež zakonjedawar plahowarjam předpisa, přiwšěm pak chce MKH žiwjenske wuměnjenja hišće bóle polěpšić. „W starych twarjenjach smy hranicy docpěli. Za wjace žiwjenskeho dobra je nowa hródź trěbna“, wuswětli jednaćel agrarneje towaršnosće MKH Beno Mróz, kiž je za ratarski wobłuk w zawodźe zamołwity.
