Ratarske zawody w Błótach tuchwilu chrěn žněja
Lubin (SN/BŠe). Ratarske zawody w Błótach žněja nětko chrěn, kotryž je zakład woblubowaneje wótreje pasty. „Z kwalitu sym lětsa jara spokojom“, zdźěli ratar Dirk Richter na njedawnym oficialnym zahajenju žnjow w Klěšojcu (Klein Klessow), hdźež tule zeleninu plahuje. „Spadki minjenych tydźenjow bychmy hižo w oktobrje trjebali. Přiwšěm njemóžu lětsa přemało dešća w běhu lěća dla skoržić. Jeničce w awgusće trjebachu rostliny wjace wody, a tuž smy polo krjepili.“ Dirk Richter plahuje chrěn na něhdźe hektar wulkej přestrjeni. Na 60 procentach płoniny wěnuje so wón starej družinje błótowskeho chrěna. A chce płoninu hišće dale rozšěrić. Dokelž so za zachowanje stareje družiny zaměrnje zasadźa, su jemu loni hižo inowaciske myto „Złote kopjeno“ (Goldener Heuschober) spožčili. Wot lěta 2011 wuznamjenja město Lubnjow zhromadnje z Błótowskim towarstwom angažement a ideje, kotrež žiwjenje w Delnjej Łužicy wobohaćeja.
