Łužisku konferencu DGB tónkróć online přewjedli
Choćebuz (SN/dpa/BŠe). Wobwodaj Němskeho zwjazka dźěłarnistwow (DGB) Berlin-Braniborska a Sakska žadatej sej wuske wobdźělenje hladajo na wuhotowanje wulkeje změny łužiskich industrijnych stawiznow. To wuzběhnychu wobdźělnicy wčerawšeje 17. łužiskeje konferency, kotraž bu online přewjedźena. Tež sakski ministerski prezident Michael Kretschmer (CDU) a jeho braniborski kolega Dietmar Woidke (SPD) staj so na zarjadowanju wobdźěliłoj.
Michael Kretschmer kritizowaše plany noweje amploweje koalicije wudobywanje brunicy hižo do lěta 2030 zakónčić. Dźěłarnistwa měli so tomu wobarać a protestować. Politika njeměła so wot brunicoweje komisije zdźěłanemu kompromisej spřećiwić. „Chceće-li něšto docpěć, wužiwajće złamanu dowěru, kotruž koaliciske zrěčenje wobsahuje“, sakski ministerski prezident wuzběhny. Wutworić tysacy nowych derje płaćenych dźěłowych městnow njeje w pjeć do wosom lětach móžno.
