Budyske tradiciske předewzaće Eule-pišćeletwar tzwr wobsteji 150 lět

Jedne z tradiciskich předewzaćow w Budyšinje swjeći w swojim domicilu na Wjelećanskej dróze tele dny 150. narodniny. Anne-Christin Eule firmu Eule-pišćeletwar tzwr w štwórtej generaciji wuspěšnje nawjeduje. Jedna wěc pak ju boli.

Budyšin (UM/SN). Swoje přemysło je Hermann Eule wčera před 150 lětami, 26. januara 1872, w Budyšinje přizjewił. Jeho mjeno je hač do dźensnišeho z wopřijećom, znatym daloko za mjezami regiona: Eule-pišćele. „700 Eule-pišćelow po cyłym swěće mjeztym je“, praji Anne-Christin Eule. Wona je praprawnučka załožerja a nawjeduje předewzaće w štwórtej generaciji.