Elektrifikacija železniskeje čary mjez Drježdźanami a Zhorjelcom je horco ­diskutowana tema. Zwisk njeje jenož mjezy přesahowacy wažny, ale wobwliwuje tež wuwiće industrijnišćow w Hornjej Łužicy.

Budyšin (SN/BŠe). Hižo lěta tłóča zastupjerjo politiki a hospodarstwa na elektrifikaciju železniskeje čary mjez Drježdźanami a Zhorjelcom, dotal pak běchu wšitke prócowanja podarmo. Hladajo na strukturnu změnu brunicoweho regiona bě zaso trochu nadźije, zo so nuznje trěbna naprawa bórze tola přewjedźe, wšako chce zwjazkowe knježerstwo wšitke trěbne srědki k dispoziciji stajić. Ze spěchowanskeho hornca, kotryž je předwidźany za projekty změny, pak njemóža akterojo čerpać. To je so jim minjene lěćo zaprajiło. Nětko ma so nowa strategija wuwić, tola hišće srědki za elektrifikaciju čary dóstać.