Hamor (SN/BŠe). Sto tonow ćežki hober-sušak je minjeny pjatk skónčnje Hamor docpěł. Něhdźe 40 metrow dołhi, wjac hač šěsć metrow šěroki a tři a poł metra wysoki wosebity nastroj słuša wobswětowemu posłužbarjej Veolia a ma přichodnje wob lěto něhdźe 50 000 tonow čisćenskeho błóta komunalnych připrawow Sakskeje, Łužicy kaž tež Berlina sušić. Maćiznu chcedźa potom jako narunanske paliwo wužiwać. Proces ma wobswětej tyjacy być, wšako chcedźa zamołwići wotedawanu ćopłotu Hamorskeho zawoda předewzaća Łužiska energija a milinarnje (LEAG) wužiwać. Naslědny projekt we Łužicy ma tak zdobom ke škitej klimy w Sakskej přinošować.