Swětoznata hra Monopoly nětko tež w serbskimaj rěčomaj předleži
Budyšin (SN/BŠe). Po cyłym swěće najznaćišu hru Monopoly móža ludźo nětko tež w hornjo- a delnjoserbšćinje hrać. Na Łužicu přiměrjenu wersiju su wčera w Budyskim Serbskim domje zjawnosći předstajili. Hakle tam zhonichu přitomni potajnstwo, kotre/kotra z cyłkownje 22 městow a gmejnow je onlinowe wurisanje Łužičanow dobyło/dobyła a kotra je najdróša městnosć deskoweje hry. A kak móhło hinak być, najwjac ludźi bě za město Budyšin hłosowało.
Hižo před lětom běchu iniciatorojo wokoło Floriana Freitaga ze Šwikawskeho předewzaća polar/1 zhromadnje z Düsseldorfskim nakładnistwom za hry Winning Moves ideju Łužiskeje edicije rozłožili a zjawnosć wo podpěru prosyli. „We wuhotowanskim procesu je so wotbłyšćowało, kelko móžnosćow region skići“, Freitag wuzběhny. Wjac hač 5 000 namjetow za městnosće, hrajne karty atd. dochadźeše z ludnosće. „Njemóžachmy tuž scyła wšitke atrakcije do hry zapřijeć.“