Kamjenske stejnišćo accumotive fleksibelnje a eficientnje dale dźěła
Kamjenc (SN/BŠe). Dawno słušatej Kamjenskej tworni accumotive k najwažnišim dźěłodawarjam regiona. A tež přichodnje maja přistajeni zawoda ruce połnej dźěła. Accumotive dźě słuša k sto procentam Mercedes-Benz Group AG a je z tym wotnožka koncerna. Kaž z naprašowanja pola accumotive wuchadźa, přihotuje so Mercedes-Benz, znaty pod symbolom hwězdy, na ryzy elektriski přichod. Hač do kónca lětdźesatka chce awtotwarc wšudźe tam, hdźež su wične wuměnjenja date, jenož hišće elektrisce ćěrjene jězdźidła poskićeć.