Wulke dźěle Budyskeho wokrjesa dale potencielna kónčina za trěbny skład
Budyšin (SN/at). Najzašo hač do lěta 2031 chce Zwjazkowa towaršnosć za kónčne składowanje (BGE) stejnišćo postajić, hdźež maja so w Němskej wot lěta 2050 radioaktiwne wotpadki na wěčne deponować. Hłubokosć składa budźe tak wulka, zo za wobswět žadyn strach njehrozy. Kónc měrca je BGE aktualny dźěłowy staw wozjewiła. Po tym je po cyłym Zwjazku 90 dźělnych kónčin definowanych, w kotrychž BGE reprezentatiwne nachwilne wěstotne přepytowanja za tajki skład pokročuje. Za štyri geologiske formacije su metody přepytowanja wuwili a tam testowali. Jedna tajka formacija su kristaline nošerske kamjenizny saxothuringikuma, pasma zdźěla přewšo kompleksnje wutworjenych cyłkow kamjeniznow. Wone su wosebje w Durinskej a Sakskej na powjerchu přistupne.