Potrjecheni łužiskich brunicowych jamow su so ze spjećowarjemi porynskeho rewěra solidarizowali a jako znamjo štomy sadźeli. Minjeny kónc tydźenja běchu přećiwnicy wuhlowych jamow na zapadźe demonstrowali.

Wochozy (SN/BŠe). Z protesta přećiwo trjebjenju lěsa při brunicowej jamje přez koncern Łužiska energija a milinarnje (LEAG) su čłonojo wobswětoweje skupiny Zelena liga štomy na swoju najatu ležownosć zesadźeli. „Łužičenjo solidarizuja so ze spjećowarjemi w Porynskej. Tam a tež tule wudobywanje brunicy žane rozrisanje njeje“, wuzběhny čłonka Zeleneje ligi Rebekka Schwarzbach. Přede­wšěm zhladuje wona na ratarja Eckeharda Heukampa z Lützeratha, kotryž bě so lěta dołho přećiwo wuswojenju swojich płonin wobarał. Spočatk apryla bu wozjewjene, zo dyrbješe wón swoje přestrjenje a dwór energijowemu koncernej RWE předać. „To nas rudźi. Při­wšěm nam pad zmužitosć njebjerje. Dobrowólnje naš lěs někomu njepřewostajimy a za přichod štomy sadźamy“, wona dale podšmórny.