Němski centrum za astrofyziku je nětko prěnje wuslědki swojich probowych točenjow w gmejnje Ralbicy-Róžant blisko Konjec předstajił. Wone su dotalne nadźije wopodstatnili.

Konjecy (UM/SN). Łužica je jónkrótna. Tele dopóznaće njeje tu bydlacym překwapjenje. A tola so cyle nowy aspekt jónkrótnosći přidruži, mjenujcy geologiski. „Smy tu pokład našli, kotryž zběhamy a z kotrymž chcemy dale dźěłać“, rjekny prof. Günther Hasinger předwčerawšim na prezentaciji točenskich wuslědkow blisko Konjec. Wědomostny direktor Europskeje swětnišćoweje agentury (ESA) je spokojom z wuslědkami probowych točenjow blisko Konjec. Wone su prěni krok za wutworjenje podzemskeho astrofyzikaliskeho slědźenskeho labora („Low Seismic Lab“).