Salome Zelnakec je lětuša Drježdźanska wosuškowa holca

Drježdźany/Kamjenc (SN/BŠe). Countdown za Drježdźansku wosuškowu sezonu běži a pjekarjo hotuja so hižo na lětuši wjeršk. Dypkownje do zahajenja sezony bu wčera 28. Drježdźanska wosuškowa holca předstajena: Serbowka Salome Zelnakec z Kamjenca. „Za mnje je to wulka česć“, wona na wčerawšim předstajenju w Drježdźanskim wobchadnym muzeju zwurazni. Tuchwilu je 17lětna wučomnica w Donathec pjekarni a konditarni w sakskej stolicy. Přichodne měsacy pak změje wona nimo toho wjele terminow, wšako je wotnětka oficialna markowa pósłanča Drježdźanskeje cechi pjekarjow wosuška a budźe nětko lěto dołho w nadawku jeje złoteho pječata po puću. „Drježdźanski božodźěsćowy wosušk njeje jenož někajke pječwo. Wón je hodowny pósłanc a steji za lětstotki dołhu tradiciju, wysokohódnotne přidawki ­a drohotne rjemjesło. Chcu ludźi wo słodźe přeswědčić a jim pokazać, kajka je to wosebitosć“, 17lětna wuzběhny.