Z tradicije transformacija wurosće. To je hłowne poselstwo, kotrež je z Borborineho swjedźenja koncerna Łužiska energija a milinarnje (LEAG) wčera w Čornej Pumpje do kraja wusyłało.

Čorna Pumpa (SN/at). Nachilace so lěto 2022 wopokaza so za LEAG jako přewšo wuspěšne. Na Borborinym swjedźenju předewzaća wčera we wulkej hali centralneje wuporjedźernje w Čornopumpskim industrijnišću mjenowaše předstejićel za produkciju dr. Philipp Nelessen mnóstwo 50 milionow tonow brunicy, kotrež lětsa zmilinjenja. Za klětu samo ze 60 milionow tonow wuchadźeja, štož by porno 2021 wo połojcu wjace było. Stopnjowanje na štyri miliony tonow zlěpšowanskich produktow briketow a brunicoweho procha lětsa nima hišće kónca być. Ze za 2023 předwidźanymaj 4,2 milionomaj tonow docpěja produkcisku ličbu, kotraž mějachu po słowach Nellesena posledni raz před 25 lětami. Produkciju briketow a procha na drjewo přestaja. „Hač do 2025 chcemy wjace wobrota z drjewom docpěć hač z brunicu“, předstejićel za produkciju wuzběhny.