Bobry zawostajeja wulke škody, ale su za biodiwersitu njeparujomne

Budyšin (SN/BŠe). Wjesny park w Jabłońcu je idyliska městnosć a skići dobre móžnosće za wodychnjenje. Mjeztym su so tam tež bobry zaměstnili. Poprawom je to dobre znamjo intaktneje přirody. Tola wobydlerjo so nad swojim zwěrjećim susodom njewjesela, dokelž bobry škody zawostajeja. Wo podobnych padach móžemy w nowinach časćišo čitać a tež njedawny pad na zwjazkowej awtodróze A 4 mjez Ohornom a Porchowom je wulku kedźbnosć zbudźił, jako je tam štom na dróhu a na třěchu awta zrazył. Na zbožo nasta jenož wěcna škoda a šoferka z Běłeje Wody je so dale z jězdźi­dłom na dompuć podała. Policija zwěsći bobra jako přičinu njezboža. Jasne je, zo so zwěrjo dale a bóle po wodźi­znach wupřestrěwa a swoje slědy zawostaja. Mjeztym su zamołwići w Braniborskej a Sakskej bobrowy management ­zarjadowali, w kotrymž su wšelake postajenja hladajo na wobchadźenje a wotškódnjenje zrjadowane.