Wojerecy (SN/mb). Rozsudźacy gremij LEADER-regiona Łužiska jězorina je so na swojim wčerawšim posedźenju we Wojerowskej radnicy z próstwami wo spěchowanje zaběrał. Něhdźe dwaceći zastupjerjow komunow a towaršnostnych organizacijow – mjez nimi referent Domowiny za hospodarske a infrastrukturelne naležnosće Pětr Brězan – je po informacijach našeho wječornika někak 800 000 z 1,08 milionow eurow přizwoliło. Tuta suma steji po prěnjej namołwje, projekty zapodać, k dispoziciji. Z tym chcedźa naprawy na dobro zakładneho zastaranja a žiwjenskeje kwality (400 000 eurow), hospodarstwa a dźěła, turizma a wočerstwjenja w bliskosći, bydlenja (kóždy wobłuk 200 000) a přirodu/wobswět (80 000) podpěrować. LEADER, tak Pětr Brězan, je „jara wažny faktor za wuwiće wjeskow“, wšako steji tule přetwar stareje substancy za nowy wužitk w srjedźišću. Tuchwilu dźe na přikład wo prózdninske domčki, parkowanišća abo wosebite hrajkanišća. Spěchuja projekty ze 40 do 70 procentami – čim mjenje, ćim wjac dochodow móže nošer projekta wočakować.