Ochranow (SN/AN). Tež lětsa su w adwenće hwězdy z Ochranowa zaso jara požadane, na čož pokazuja wysoke ličby předawanja. Wot lěta 2015 nastawaja w manufakturje hwězdow w Ochranowje lětnje tež wosebite, limitěrowane edicije abo nowe produkty. Lětuša wosebita edicija małeje hwězdy A1e ma so błyskotacu čerwjenu optiku. Nimo tuteje poskići manufaktura lětsa lěpjenu papjerjanu hwězdu jónu w nowej smaragdo-zelenej barbje a jónu z kwětkojtym motiwom njezapomnički. Prěnja mjenowana warianta je kruće limitěrowana a da so jenož přez zbožo při losowanju kupić. Tež wosebita „hwězda literatury“ składnostnje lětušich 125. narodnin Comeniusoweje kniharnje w Ochranowje je nowostka we wobłuku produkciskeje serije. Tuta wobsteji z papjery trjebanych abo wuzběranych knihow. Rozdźělny staw papjery wobwliwuje z tym čas za produkowanje, znajmjeńša trjeba fachowc dwě hodźinje. Tuchwilu je wupředata a steji­ po wšěm zdaću hakle nalěto zaso k dispoziciji.