W Radworju rjemjeslnicy, ratarjo a wobydlerjo zhromadnje protestowali
Radwor (SN/BŠe). Ze serbskim postrowom witaše předewzaćel Tomaš Rječka z Kamjeneje minjeny pjatk něhdźe 170 ratarjow, rjemjeslnikow a wobydlerjow gmejnow Radwor, Wulka Dubrawa a Malešecy na Radworskej nawsy. Prěni raz přewjedźechu tam protestnu akciju „Přećiwo zanjechanju wjesnych kónčin“. Hnydom na spočatku zarjadowanja skedźbni nawoda zhromadźizny Tomaš Rječka na to, zo njeje tole politiske zarjadowanje, hdźež so strony zastupuja. Předewšěm dźe wo starosće wobydlerjow a předewzaćow w kónčinje.
